بو غزل مثنوی نی ایتحاف ائدیره م بو مجازی ائوین یاشایانلارینا ، تورکو بیلیب تورکو یازانلارا ، اومید کی لئیاقتی میز اولا تورک ادبیاتینین قوللوقوندا اولماقا ... نه گوزه ل دیر اؤز دیلینده اوره ییندن جوشان دویغولاری اوره ک لرین صحیفه سینه حک ائتمک .
یاز قیزی
قیش گونومه قالمایاجاق یاز قیزی
گؤیلومو هئچ آلمایاجاق یاز قیزی ؟
اووچالاییب کونلومو حسرت / بیتیب
گؤی نفسین سالمایاجاق یاز قیزی
قیش الیمی / چکمیشم اوستوندن آه !
یاز گونو قارتالمایاجاق یاز قیزی
سوسما قیش اوغلو چاغینی سازلا شن
سنله داها چالمایاجاق یاز قیزی
***
قیش گئجه سی گؤیلومه یاز / یاز دوشوب
کؤکسومون اوستونده یاتان ساز دوشوب
بارماقیمی تئللرینه تئلماشا!
داي نه زامان مندن ايراق تئل ـ ماشا
اوسلويونه یاش چیله دیم ، گلمه دی
دیز چؤکوروب سیلکه له دیم ، گلمه دی
باش گؤتوروب گئتدی اوزاقلاشدی هئی ...
چیلله گئجه م دن گونوزه قاشدی هئی ...
ایندی ده وار یولدا قالیب گؤزلریم
چؤللره قارشی باش آلیب گؤزلریم .
ائلیاز ـ قیش ۸۶
